უკრაინის პრეზიდენტმა, ვოლოდიმირ ზელენსკიმ დაავალა უმაღლეს თანამდებობის პირებს – თავდაცვის მინისტრს, სადაზვერვო სამსახურების ხელმძღვანელებსა და დიპლომატებს, დაუკავშირდნენ აშშ-ში პარტნიორებს და მიიღონ ოფიციალური ინფორმაცია სამხედრო დახმარების სამომავლო გეგმების შესახებ.
უკრაინის პრეზიდენტმა აღნიშნა, რომ დღეს ქვეყანაში ბევრს აქვს ერთი შეკითხვა: რა მოხდება შემდგომ აშშ-ის დახმარებასთან დაკავშირებით.
„მე დავავალე უკრაინის თავდაცვის მინისტრს, ჩვენი სადაზვერვო სამსახურების ხელმძღვანელებსა და დიპლომატებს, დაუკავშირდნენ აშშ-ის თავიანთ კოლეგებს და მიიღონ ოფიციალური ინფორმაცია. ხალხს არ უნდა მოუწიოს გამოცნობა. უკრაინა და ამერიკა იმსახურებენ პატივისცემით სავსე დიალოგს, ერთმანეთის მკაფიო პოზიციების გაგებას“, – განაცხადა ზელენსკიმ.
როგორც ვოლოდიმირ ზელენსკიმ განმარტა, უკრაინა ხედავდა რისკებს, რის გამოც სპეციალურმა სამსახურებმა მოახერხეს მოქმედების ალგორითმის მომზადება ნებისმიერი სცენარისთვის.
უკრაინის პრეზიდენტის თქმით, ახლა სხვა დროა: „2022 წელი აღარ არის. ახლა ჩვენი გამძლეობა უფრო მაღალია, გვაქვს დაცვის საშუალებები, მაგრამ ჩვენთვის მნიშვნელოვანია ნორმალური, პარტნიორული ურთიერთობები ამერიკასთან, რათა ომი ნამდვილად დასრულდეს“,- აღნიშნა ზელენსკიმ.
ცნობისთვის, დონალდ ტრამპმა უკრაინის სამხედრო დახმარება შეაჩერა. მედიაში გავრცელებული ცნობით, ტრამპმა ეს გადაწყვეტილება 28 თებერვალს თეთრ სახლში უკრაინის პრეზიდენტთან, ვოლოდიმირ ზელენსკისთან მომხდარი დაპირისპირების შემდეგ მიიღო.
