პრეზიდენტმა სალომე ზურაბიშვილმა საქართველოს საკონსტიტუციო სასამართლოს სარჩელით მიმართა და არჩევნების საბოლოო შედეგების არაკონსტიტუციურად ცნობა მოითხოვა. ინფორმაციას ამის შესახებ პრეზიდენტის ადმინისტრაცია ავრცელებს.
უწყების ცნობით, არჩევნების საყოველთაობისა და ფარულობის პრინციპების დარღვევიდან გამომდინარე, საქართველოს პრეზიდენტი მოითხოვს არჩევნების მომწესრიგებელი სადავო ნორმებისა და მათ საფუძველზე ჩატარებული არჩევნების საბოლოო შედეგების არაკონსტიტუციურად ცნობას. ბათუმში პრეზიდენტის სარჩელი საქართველოს პრეზიდენტის წარმომადგენელმა ეკა ბესელიამ დღეს შეიტანა.
ეკა ბესელიას განცხადებით, პრეზიდენტმა სარჩელი შეიტანა, რათა გამოყენებული იქნას ყველა სამართლებრივი მექანიზმი.
„ეს სარჩელი არის ძალიან მნიშვნელოვანი, მიუხედავად იმისა, რომ საკონსტიტუციო სასამართლოს მიმართ, სამწუხაროდ, ნდობა არ არის. ამ სასამართლოს დამოუკიდებლობა თავად სასამართლომ, თავისი ბოლო გადაწყვეტილებებით დააყენა დიდი დარტყმის ქვეშ. ამ სამართლებრივ გზას პრეზიდენტი მიმართავს, რათა ყველა სამართლებრივი სივრცე, ყველა სამართლებრივი მექანიზმი უნდა იქნას გამოყენებული.
პირველი – ეს არის საყოველთაობის დარღვევა, რაც გამოიხატა იმაში, რომ ქვეყნის გარეთ მყოფი ჩვენი მოქალაქეებისთვის კონსტიტუციური უფლებით სარგებლობის შესაძლებლობა არამხოლოდ შეიზღუდა, არამედ აეკრძალათ კიდეც. მეორე უმნიშვნელოვანესი პრინციპი რაც არის კონსტიტუციაში ესაა
არჩევნების დროს ხმის ფარულობის დაცვა. ამ საკითხთან დაკავშირებით არის არაერთი დადასტურებული მტკიცებულება, რომ არჩევნების ფარულობა დაირღვა, რაც ასევე კონსტიტუციური სტანდარტის დარღვევაა. ჩვენ ასევე ვიდავებთ იმ ნორმების კონსტიტუციურობაზე, რომელიც პარლამენტის წევრებს აიძულებს უფლებამოსილების ცნობის პროცედურა გაიარონ და მათი უფლებამოსილები შეწყვეტა არ ხდება იმავე ეტაპზე, რაც ეტაპზეც გაცხადებულია ნება, რომ ისინი არ იქნებიან იმ პარლამენტში, რომლის შედეგები გაყალბდა“, – აღნიშნა ბესელიამ.
ცნობისთვის, სალომე ზურაბიშვილმა განაცხადა, რომ საკონსტიტუციო სასამართლოში სარჩელი შეაქვს არჩევნების ფარულობისა და საყოველთაობის პრინციპების დარღვევის გამო და უნდა მოსამართლეების სინდისი გამოსცადოს.
