აშშ-ის დემოკრატიაში ძალადობის ადგილი არ არის. ეს არის ვაშინგტონის გზავნილი მსოფლიოსადმი, – ამის შესახებ აშშ-ის სახელმწიფო დეპარტამენტის სპიკერმა, მეთიუ მილერმა განაცხადა.
„დღეს ჩვენ ვიცით, რომ ადამიანებს მთელ მსოფლიოში, მთავრობებს მთელ მსოფლიოში, ისევე, როგორც ამერიკელებს, აქვთ კითხვები იმის შესახებ, თუ რა მოხდა შაბათს. ჩვენი გზავნილი მათთვის მარტივია, როგორც პრეზიდენტმა ბაიდენმა აღნიშნა, ჩვენს ქვეყანაში ძალადობის ადგილი არ არის. ჩვენ ვგმობთ ამ თავდასხმას და ყოველგვარ პოლიტიკურ ძალადობას, ვგმობთ პოლიტიკურ ძალადობას ნებისმიერ ქვეყანაში, ისევე როგორც ვგმობთ წინა პოლიტიკურ ძალადობას ამერიკის შეერთებულ შტატებში. ასე რომ, ასეთ დროს, როდესაც ადამიანებს მთელ მსოფლიოში უჩნდებათ შეკითხვები ჩვენი დემოკრატიის შესახებ, ჩვენ უნდა ვაჩვენოთ, თუ როგორ ვპასუხობთ. დღეს დილით ბლინკენმა მოიწვია უმაღლესი ხელმძღვანელობის გუნდი აქ, დეპარტამენტში, რათა შეახსენოს მათ, რომ ამერიკის ერთ-ერთი ძლიერი მხარე ჩვენი ისტორიის განმავლობაში იყო უნარი, დავიბრუნოთ ჩვენი ადამიანურობა, ჩვენი ფუნდამენტური წესიერება, ძალადობისა და არაადამიანური აქტების შემდეგ. მან სთხოვა, რომ ეს გზავნილი გადასცენ მთელ მსოფლიოს, შეახსენონ ჩვენს მოკავშირეებსა და პარტნიორებს, რომ ამერიკას ადრეც გაუვლია რთული პერიოდი, მაგრამ ჩვენ ამ სირთულეებმა უფრო ძლიერები გაგვხადა ჩვენი ძირითადი ფასეულობების წყალობით, რომლებსაც ვიზიარებთ, როგორც ერი“, – განაცხადა მილერმა.
ამასთან, ჟურნალისტის კითხვაზე კრემლის ბრალდებებთან დაკავშირებით, სადაც კრემლმა ბაიდენის ადმინისტრაცია დონალდ ტრამპისთვის სროლისთვის ატმოსფეროს შექმნაში დაადანაშაულა, მილერმა განაცხადა, რომ ეს არ შეესაბამება სიმართლეს.
„ცხადია, ეს წარმოუდგენლად უპასუხისმგებლო კომენტარებია კრემლისგან და რა თქმა უნდა, ისინი არ შეესაბამება სიმართლეს“, – განაცხადა მილერმა.
ამასთან, აშშ-ის სახელმწიფო დეპარტამენტის სპიკერმა მოუწოდა ამერიკულ საზოგადოებას და სხვა ქვეყნებს, თავი შეიკავონ სპეკულირებისგან ან უპასუხისმგებლო პრეტენზიებისგან, ვიდრე თავდასხმის შესახებ ყველა ფაქტი არ გახდება ცნობილი.
