სახელმწიფო დეპარტამენტის სპიკერს მეთიუ მილერს ბრიფინგზე ევროკავშირის მიერ მიღებულ გადაწყვეტილებაზე ჰკითხეს, რომლის თანახმადაც, EU საქართველოს თავდაცვის სფეროს მხარდასაჭერად გამოყოფილ 30 მილიონ ევროს გაყინავს.
მეთიუ მილერმა გაიმეორა ევროკავშირისა და აშშ-ის პოზიცია, რომლის თანახმადაც, საქართველოში დემოკრატიულ უკუსვლას მათი მხრიდან “შედეგი მოჰყვება”.
“რა თქმა უნდა, ეს ევროკავშირის მიერ მიღებული გადაწყვეტილებაა და ამაზე უფრო სათანადო კომენტარის გაკეთება მათ შეუძლიათ. მაგრამ მე ვიცი, რომ მათ [ევროკავშირში] ცხადად თქვეს, ისევე როგორც ჩვენ ცხადად ვთქვით, როდესაც საქმე საქართველოსთან ჩვენს ურთიერთობებს ეხება, რომ საქართველოს დემოკრატიულ უკუსვლას შედეგები მოჰყვებოდა”, – თქვა მეთიუ მილერმა.
ჟურნალისტმა მას ასევე საქართველო-აშშ-ის ურთიერთობებზეც ჰკითხა, რაზეც სახ.დეპის სპიკერმა თქვა, რომ ვაშინგტონში თბილისთან ურთიერთობების “გადახედვა კვლავ გრძელდება”.
“ცხადია, ჩვენ ვეწინააღმდეგებით განსხვავებული აზრის ჩახშობის მცდელობებს და ჩვენ ამის შესახებ არაერთხელ გვითქვამს, იგივე პოზიცია გამოვხატეთ უცხოური გავლენის შესახებ კანონის მიღებასთან დაკავშირებითაც, რომ ის გამოყენებული იქნებოდა ლეგიტიმური და დემოკრატიული დისიდენტური ხმების ჩასახშობად. ეს არის ქართული ოცნების ქცევის შემაშფოთებელი ნიმუში და ჩვენ მოვუწოდებთ მათ, რომ ეს შეცვალონ”, – თქვა მეთიუ მილერმა.
9 ივლისს ევროკავშირის ელჩმა განაცხადა, რომ ევროკავშირმა საქართველოს თავდაცვის სფეროს მხარდასაჭერად გამოყოფილი 30 მილიონი ევრო გაყინა. გარდა ამისა, ჰერჩინსკიმ თქვა, რომ საქართველოს ევროკავშირში გაწევრიანება შეჩერებულია.
ელჩმა აღნიშნა, რომ ევროკავშირის ლიდერებისთვის გაურკვეველია საქართველოს ამჟამინდელი ხელისუფლების განზრახვა, ხოლო ე.წ. უცხოური გავლენის გამჭვირვალობის შესახებ კანონი 9 ნაბიჯისგან აშკარა უკუსვლად შეაფასა.
