ამერიკის ვიზას რუსეთის მეტი მოქალაქე თუ იღებს, რუსეთში 170 მილიონი ადამიანია, საქართველოში ოთხი მილიონი. „ქართული ოცნების“ მხრიდან ადგილი აქვს დემაგოგიურ ტყუილს. მოსახლეობასთან პროპორციულად ეს ისე არ არის, როგორც ხელისუფლება ამბობს, – ამის შესახებ ოპოზიციონერმა დეპუტატმა, რომან გოცირიძემ განაცხადა.
რომან გოცირიძემ კომენტარი გააკეთა იმასთან დაკავშირებით, რომ აშშ-ის სახელმწიფო დეპარტამენტის 2023 წლის მონაცემების მიხედვით, საქართველოს მოქალაქეებისთვის ვიზაზე უარის მაჩვენებელი 49.23 პროცენტს შეადგენს. ბელარუსის შემთხვევაში ეს მაჩვენებელია 32.80 პროცენტი, რუსეთის შემთხვევაში კი – 39.49 პროცენტი.
გოცირიძის თქმით, საქართველოდან ადამიანები მასობრივად გარბიან, რადგან ქვეყანაში უმძიმესი ეკონომიკური მდგომარეობაა შექმნილი.
„ამერიკაში ასობით ადამიანი მექსიკის საზღვრიდან შედის. ამერიკაში თუნდაც ვიზით შესული ქართველების უმრავლესობა ამერიკაში რჩება. მოქალაქეები საქართველოდან გარბიან. ერთ-ერთი ყოფილი დეპუტატია, რომელიც მექსიკის საზღვრიდან ამერიკაში გადავიდა. ძალოვან უწყებაში მაღალჩინოსანი იყო და არ მოუპარავს, პატიოსანი იყო. გაჭირვების გამო მასაც საქართველოდან წასვლა და ამერიკაში მექსიკით ჩასვლა მოუწია“, – აღნიშნა რომან გოცირიძემ.
