„ნაციონალური მოძრაობის“ აქტივისტის, ნიკო მანაგაძის დედა პრემიერ-მინისტრთან შეხვედრას ითხოვს. ვიკა კვიტაშვილი ამბობს, რომ წლების განმავლობაში არასამთავრობო ორგანიზაციებს ახალგაზრდები შეცდომაში შეჰყავთ და მათ პროტესტისთვის იყენებენ.
ნიკო მანაგაძის დედა ასევე ამბობს, რომ რადიკალებისთვის მისი შვილის სიცოცხლე ჩვეულებრივი მასალა იქნება.
„ყოველთვის ძალები, რომლებსაც სურთ რევოლუცია, არეულობა ქვეყანაში, ახალგაზრდებს იყენებენ, რადგან მათი დამორჩილება ადვილად შეიძლება. იყენებენ აქტიურებს, ნიჭიერებს, ისეთებს, როგორიც არის ნიკო [მანაგაძე].
სკოლაში სწავლის დროიდან დაინტერესდნენ ნიკოთი „ენჯეოები“ და კარგად „ამუშავეს“. სჭირდებათ ასეთი ბავშვები. მათზე პასუხისმგებლობასაც ბოლომდე არ აიღებენ, გამოიყენებენ და ეგ არის.
ვინც ნიკოს უკან დგას, მათთვის ნიკო მასალაა და ოჯახისთვის, რომ რამე მოხდეს, ტრაგედიაა. ველოდები გამოძიებას [ნიკო მანაგაძეზე თავდასხმის საქმეზე]. დარწმუნებული ვარ, სამართლიანად მოხდება გამოძიება“, – აღნიშნა ნიკო მანაგაძის დედამ „ქრონიკასთან“ სატელეფონო საუბარში.
მშობლის განცხადების პასუხად, ნიკო მანაგაძემ განაცხადა, რომ დედასთან ურთიერთობა არ აქვს და მისთვის ამორალურია ამის მოსმენა.
