„კანონის „უცხოური გავლენის გამჭვირვალობის შესახებ“ მიღების აუცილებლობა უმრავლესობის ინიციატივით პოლიტიკურ დღის წესრიგში ისევ დაბრუნდა. დღეს ამ ინიციატივის მიმართ საზოგადოების დიდი ნაწილი ერთსულოვანია, რადგან ისინი მეტად ინფორმირებულნი არიან და იაზრებენ ამ კანონის მიღების აუცილებლობას“, – ასე ეხმაურება „ხალხის ძალის“ წევრი თამთა მეგრელიშვილი „ქართული ოცნების“ აღმასრულებელი მდივნის, მამუკა მდინარაძის განცხადებას, „უცხოური გავლენის გამჭვირვალობის შესახებ“ კანონპროექტის პარლამენტში წარდგენას.
როგორც მეგრელიშვილი აღნიშნავს, დესტრუქციულთა მცდელობა უკვე მოძველებული და გახუნებული ნარატივით – გავაპროტესტოთ „რუსული კანონი“ საფუძველს მოკლებულია და მხოლოდ მათი დონორებისათვის საგანგებოდ დადგმული, საჩვენებელი ეიფორია იქნება.
„კანონის „უცხოური გავლენის გამჭვირვალობის შესახებ“ მიღების აუცილებლობა უმრავლესობის ინიციატივით პოლიტიკურ დღის წესრიგში ისევ დაბრუნდა. მიზეზი, ქვეყანაში არასამთავრობო სექტორისათვის სხვადასხვა დონორების მიერ გადმორიცხული დიდი ოდენობით ფულია, რომლის გახარჯვაც, შავი ფულის სახით, გრანტის მიზნებს სცდება და უმეტესად პოლიტიკური, ანტისახელმწიფოებრივი დანიშნულება აქვს. კანონის პროექტით უცხოური ძალად ითვლება უცხო სახელმწიფო, უცხო ქვეყნის ფიზიკური ან იურიდიული პირი; სუბიექტად განიხილება უცხოური ძალის ინტერესების გამტარებელი ორგანიზაცია; კანონი ფარავს არასამეწარმეო იურიდიულ პირს და მედიას, რომლის შემოსავლის 20%-ზე მეტი უცხოეთიდანაა (არ ეხება სპორტულ ფედერაციებს);
კანონით მოთხოვნილი ვალდებულება მარტივია – ორგანიზაციამ ყოველი წლის იანვარში წინა წლის შემოსავლების და ხარჯების დეკლარირება უნდა მოახდინოს; დეკლარაციის წარუდგენლობისთვის გათვალისწინებულია ჯარიმა, 25 000 ლარი (თუ მაინც არ წარადგენს 20 000 ლარი არაუმეტეს თვეში ერთხელ) კანონის მიღების შემდეგ – იმ ორგანიზაციებს, რომელთა შემოსავლების 20%-ზე მეტი 2023 წლის მონაცემებით უცხოეთიდან იყო, ვალდებული იქნებიან კანონის ამოქმედებიდან 3 თვეში წარადგინონ 2023 წლის დეკლარაცია. დღეს ამ ინიციატივის მიმართ საზოგადოების დიდი ნაწილი ერთსულოვანია, რადგან ისინი მეტად ინფორმირებულნი არიან და იაზრებენ ამ კანონის მიღების აუცილებლობას. შესაბამისად დესტრუქციულთა მცდელობა უკვე მოძველებული და გახუნებული ნარატივით – გავაპროტესტოთ “რუსული კანონი” საფუძველს მოკლებულია და მხოლოდ მათი დონორებისათვის საგანგებოდ დადგმული, საჩვენებელი ეიფორია იქნება, მარტივი შინაარსით ჩვენ (დონორებო) თქვენს მხილებას ასე ვეწინააღმდეგებით“, – წერს თამთა მეგრელიშვილი ფეისბუკზე.
