ევროპული ინსტიტუტები ფულს აძლევენ გავლენიან „სოროსელებს“, რომლებიც სხედან ევროკომისიასა და ევროპარლამენტში, ამიტომ ბრიუსელი სულ უფრო მეტად ხდება მათი ტყვე, – ამის შესახებ ვიქტორ ორბანმა, უნგრულ რადიოსთან ინტერვიუში განაცხადა.
როგორც ქვეყნის პრემიერ-მინისტრმა აღნიშნა, ბრიუსელი რეალურად „სოროსის“ ქსელის პატიმარია. ორბანი მიიჩნევს, რომ ბრიუსელი საკუთარ ომს აწარმოებს მოსკოვის წინააღმდეგ, მაგრამ უნგრეთი არ ებრძვის რუსეთს.
„ჩვენ ახლა იმ ეტაპზე ვართ, როდესაც ნატო-ს ქვეყნებს მოუწოდებენ, სამხედრო დონეზე ჩაერიონ რუსეთ-უკრაინის ომში. ქვეყანა თუ რუსეთთან შეიარაღებულ კონფლიქტში შედის, ამას შეუძლია, მსოფლიო ომი გამოიწვიოს. შესაძლებელია ადგილობრივი კონფლიქტიდან მსოფლიო ომში გადასვლა. არ დაგვავიწყდეს, რომ მსოფლიო ომები დაიწყო ცენტრალურ ევროპაში“, – აღნიშნა ორბანმა.
