მაღალი ალბათობით, ჩვენ მივიღებთ დეკემბერში კანდიდატის სტატუსს, უკვე ბევრი ნიშანია, რაც ამაზე მიუთითებს. როგორც კი ეს დაინახა რადიკალურმა ოპოზიციამ, პირველი ცეცხლი გახსნა კოლექტიურმა “ნაცმოძრაობამ”: ისინი მთელი წლის განმავლობაში დადიოდნენ ევრო დერეფნებში, ხალხს არწმუნებდნენ რომ არ მისცეთ საქართველოს კანდიდატის სტატუსი, დიდი არგუმენტები არ ჰქონდათ, ერთს ამბობდნენ, რომ არჩევნებს წავაგებთ კიდევ უფრო სამარცხვინოდ, ვიდრე წინა არჩევნებში მოხდა, – ამის შესახებ საქართველოს პარლამენტის ვიცე-სპიკერმა, საპარლამენტო უმრავლესობის წევრმა, არჩილ თალაკვაძემ გადაცემაში “იმედი LIVE” განაცხადა.
თალაკვაძის თქმით, პრეზიდენტი რადიკალურ ოპოზიციაზე არანაკლებ არის დაინტერესებული კანდიდატის სტატუსის მიღება მის პირად მიღწევად ჩაითვალოს. მისი შეფასებით, ქვეყნის წარმატების მისაკუთრების მცდელობა არასახელმწიფოებრივი მიდგომაა.
“პრეზიდენტიც, როგორც ჩანს, არანაკლებ მონდომებულია, რომ ეს მიღწევა ჩაითვალოს სწორედ მის დამსახურებად. ჩემი აზრით, ეს არ არის სახელმწიფოებრივი მიდგომა, როდესაც ვინმე ცდილობს, რომ თვითონ აიღოს მესაკუთრეობა საქართველოს კანდიდატის სტატუსზე. გინახავთ სადმე, “ქართული ოცნების” რომელიმე ლიდერს ეთქვას, რომ ეს ჩემი დამსახურებაა, თქვენ კი მიშლით ხელს, მაგრამ მე მაინც მოვუტან ამ ქვეყანას კანდიდატის სტატუსს?” – რა საჭიროა ასეთი ხმამაღალი განცხადებები, მით უმეტეს, როდესაც იცი, რომ შენ, პრეზიდენტს, არ გაქვს არც კონსტიტუციით მონიჭებული უფლებამოსილება საგარეო პოლიტიკის განხორციელებაზე და თან ძალიან კარგად იცი, რომ ამ საქმის უდიდესი ნაწილი შეასრულა სწორედ მთავრობამ ხალხის მხარდაჭერით.” – აღნიშნა არჩილ თალაკვაძემ.
მისი განცხადებით, ევროკავშირის კანდიდატის სტატუსისთვის ძირითადი სამუშაო საქართველოს მთავრობამ და პარლამენტმა შეასრულა, ხოლო პრეზიდენტს შეეძლო ევროპელი კოლეგები დაერწმუნებინა ქვეყნისთვის სტატუსის მინიჭების აუცილებლობაში.
“მთავრობამ და პარლამენტმა გააკეთეს ძირითადი საქმე ევროინტეგრაციის რეფორმებში – ამოიღეთ ნებისმიერი პუნქტი, ან გააკეთა მთავრობამ, ან გააკეთა პარლამენტმა საზოგადოების მხარდაჭერით. პრეზიდენტს რაც ჰქონდა ფუნქცია, რაც შეეძლო გაეკეთებინა, ეს იყო ერთადერთი, ჩასულიყო ევროპაში და აბსოლუტურად მტკიცედ ეთქვა ის, რაც ჩვენმა ნამდვილმა მეგობრებმა ევროპაში თქვეს მტკიცედ, რომ საქართველო დღეს და უპირობოდ იმსახურებს კანდიდატის სტატუსს და ბევრმა ისიც თქვა, რომ ერთი წლის წინაც იმსახურებდა საქართველო კანდიდატის სტატუსს და ამ ფონზე, როცა ჩვენი არჩეული პრეზიდენტი ევროპელებს ეუბნება, ქვეყანა არ იმსახურებს და სამართლიანი უარი იყო ნათქვამი, მერე ეუბნება, ფორმალურად ასრულებს ხელისუფლება ანუ, თქვენ გატყუებთო, ამას როცა ეუბნება, ბუნებრივია ეს ვეღარ იქნება საქართველოს ინტერესების სრულფასოვანი და გულწრფელი დაცვა.” – განაცხადა თალაკვაძემ.
