ისრაელის საგარეო საქმეთა სამინისტროს განცხადებით, 7 ოქტომბერს „ჰამასის“ მიერ აყვანილი 2 მძევალი გარდაცვლილი იპოვეს. ამის შესახებ BBC წერს.
გამოცემის ინფორმაციით, ისინი არიან 80 წლის კარმელა დანი და მისი 12 წლის შვილიშვილი ნოია დანი, რომლებიც ნირ ოზის კიბუცში აიყვანეს მძევლად. უწყებაში არ აზუსტებენ სად აღმოაჩინეს გარდაცვლილების ცხედრები.
„მწუხარებით გაცნობებთ, რომ ნოიას და მისი ბებიის კარმელას ცხედრები გუშინ აღმოაჩინეს“, – აღნიშნულია სამინისტროს განცხადებაში, რომელიც სოციალურ ქსელში X გამოქვეყნდა.
ისრაელის თავდაცვის ძალების მონაცემებით, „ჰამასს“ 203 მძევალი ჰყავს აყვანილი.
სარაკეტო დარტყმა ისრაელზე 7 ოქტომბერს, ადგილობრივი დროით 06:30 საათზე განხორციელდა. მომხდარზე პასუხისმგებლობა ტერორისტულმა ორგანიზაცია „ჰამასმა“ აიღო. ორგანიზაციაში ისრაელის წინააღმდეგ ახალი სამხედრო ოპერაციის დაწყების შესახებ განაცხადეს. ისრაელის თავდაცვის ძალებმა „ომისთვის მზადყოფნის მდგომარეობა“ გამოაცხადა და ღაზას სექტორში „ჰამასის“ ობიექტებზე იერიში დაიწყო.
